Aiacciu Cità Corsa Per una CORSICA LIBERA
Produit CORSU E RIBELLU
(RIBOMBU) E municipali d’Aiacciu sò state annullate colpa à una froda… senza scrucconi. À l’avvicinà di u ritornu a l’urna, ind’è i stati maggiori di i partiti furmiculeghjanu i so strategichi di sottu prifettura.
Cum’è sempre quand’ellu si tratta di scutini lucali, un’interrugazione frastorna a so raziunalità eletturale. Ci vulerà à naziunalizà l’elezzione – sia qual’ella sia a Nazione – o cunsiderà chì a res publica si pianta à i cunfini di a cità ? Insomma, esaltà una razza di patriuttisimu municipale. Un campanilisimu di pulitichella ch’avemu vistu torna à l’opara à l’Assemblea di Corsica per sceglie a sede di l’uffiziu fundiariu. C’avemu assistutu ochjisburlati, o affanati. I dui infatti.
Mi tocca à cunfissalla, sta dumanda doppia, stu Janus di a strategia eletturale, ùn l’aghju mai capita. Micca u sensu ricircatu di sicuru, ma u significatu. St’uppusizione indarna trà e cose di a cità è quelle di a Nazione. A cità senza prugettu naziunale quant’è a riproduzzione di un neocentralisimu corsu chì neghi a demucrazia cumunale ghjè purtà un’andatura scianca. È infine alluntanassi da u fine di l’azzione pulitica : u cumunu.
Cità Corsa. Eccu u nome di a dimarchja municipale di Corsica Libera in Aiacciu. L’essenza di a nostra lotta. A Corsica, micca un’arcipelagu di paesi. Un paese plurale ma un paese sì. L’accessu à l’alloghju, à u fundiariu, à l’impiecu, a prumuzione d’un sviluppu chì rispetti u nostru circondu naturale è culturale, una visione di a sucetà chì ponghi à u centru l’identità, aiaccina perchè corsa, corsa perchè aiaccina. Tante quistione chì cummandanu risposte naziunale.
Ma chì si devenu nutrisce di spirienze lucale, guidate da u nostru filu, quellu di a lotta. Di a strada diritta. Ricusemu st’idea chì à u nivellu di a cumuna tuttu si valghi è chì tuttu si possi accuncià à u nome di u prammatisimu, di a gistione… è di i spartimenti di e « rispunsabbilità ». Innò, a municipale hè un’elezzione pulitica è a vita di u citadinu ùn si pò staccà di l’avvene di u paese sanu. Ogni accordu di mandatura viotu di cuntinutu puliticu hè à u megliu un sbagliu, à u peghju una trappula.
L’indipendentisti devenu guvernà a Corsica, purtà ind’è e cumune l’idee d’emancipazione, traducele in fatti. Eccu ciò chì guida a nostra azzione. È dumane, sè u bisognu si face risente, abbatte a legge francese per valè u dirittu corsu. Quellu vutatu da i so riprisintentei : l’ufficialità di u Corsu, u statutu di residente… In poche parolle, custruisce u naziunalisimu municipale.
Petr’Antone Tomasi
